Bizkaiko sagardo denboraldia datorren astean inauguratuko da, luxuzko enbaxadore batekin. Itziar Lazkano aktore bizkaitarra da sagardoaren enbaxadore berria. Laster dastatuko dugu aurtengo sagardoa.

Urtarrilaren 23an ospatuko da Bizkaiko txotxa, % 100 Bizkaiko sagarrarekin egindako sagardoarekin. Edari berria Amorebieta-Etxanoko Uxarte sagardotegian egingo den ekitaldi batean dastatu ahal izango da.

Baina ez dago txotxik enbaxadorerik gabe. Aurten, ibilbide luzeko enbaxadorea dute, oholtza gainean zein kanpoan. Aktore bizkaitar beteranoak hartuko du Bizkaiko sagardoaren izena estatu mailan zein nazioartean zabaltzeko ardura.

Lazkano antzerki-konpainia gazte baten zuzendaritzan murgilduta dago; konpainiak ostiral honetan, 19an, Egun zoragarriak lana estreinatuko du euskaraz, eta urtarrilaren 26an, gaztelaniazko bertsioa, Días estupendos. «Lan handia izan arren, eta lanaren estreinaldia gainean izan arren, ezin nion horrelako proposamen bati uko egin. Pozik nago, eta ohore bat da», esan du Itziar Lazkanok.