Aiako Izetaren sagardoa da Gipuzkoako onena, Foru Aldundiak antolatzen duen XXIV. Gipuzkoako Sagardo Lehiaketaren arabera. Bigarren postua Zapiainentzat izan zen, eta hirugarrena Altzuetarentzat. Sariak urriaren 6an, astelehenarekin, banatu ziren Albaola Itsas Etxean, eta Izetaren saria Sebastian Iruretagoiena sagardotegiko jabeak jaso zuen.

Lehiaketak beste bi aipamen ere banatzen ditu, elaborazio berrietara ausartzen direnak aitortzeko asmoz. Sagardo apardun onenarena Aburuzak eraman zuen, eta sagardo berritzaileenarena Itxasburuk, Moko barietateko sagarrarekin egindako «Batekoa»-ri esker.

Epaimahai berria eta zigilua botilan

Edizio honetako berritasuna epaimahaia izan zen: lehen aldiz, Euskal Sagardoa Jatorri Deiturak aukeratutako sommelierrek eta dastatzaileek osatu zuten. Sagardoak itsuan dastatu zituzten, Kontseilu Arautzaileak proposatutako ebaluazio-metodoarekin. Saritutako sagardoek hurrengo urtean zigilu bat eraman ahal izango dute botilan, urrezko edo zilarrezko sailkapena duten adierazten duena.

Ekitaldiak lekuz ere aldatu zuen. Aurten mila urte betetzen dira «Ipuskoa» hitza agertzen den lehen idatzizko agiritik, eta Aldundiak Albaolara eraman zuen sari-banaketa. Xabier Arruti Lurralde Oreka Berdeko diputatuak ireki zuen zeremonia, eta gogorarazi zuen sagardoa produktu «funtsezkoa izan zela XVI. eta XVII. mendeetan Ternuara bidaiatzen zuten euskal marinelen biziraupenerako».

Ekitaldi berean, erakundeak omenaldia egin zion Xabier Agote Albaolako zuzendariari, lurraldearen historiari eta kulturari egindako ekarpenagatik. Arrutik egurrean landutako sagar bat eman zion, eta nabarmendu zuen Agotek «urte luzez euskal gizon-emakumeen itsas historia berreskuratu duela».

Hamar hektarea sagasti

Hurrengo egunean, Noticias de Gipuzkoa egunkariari emandako elkarrizketan, Iruretagoienak aitortu zuen sariak ustekabean harrapatu zuela, nahiz eta bazekiten aurreko urteko sagardoa oso ona atera zela. Izetak bere 10 hektareako sagastiko sagarrarekin eta inguruko ekoizleenarekin egiten du sagardoa. Denboraldi berrirako, azaldu zuenez, kupelen % 70 sagar propioarekin bete dituzte, eta gainerakoak inguruko ekoizleen sagarrarekin. Ekoizpena 130.000 litro ingurukoa da denboraldiko, eta ia dena sagardotegiko jatetxean eta eskualdean saltzen da; esportazioa urtean sei edo zazpi paletera mugatzen da.

Iruretagoienaren ustez, aitortzak ezagutzera ematen lagunduko die: kontatu zuenez, bazen dagoeneko deitu zienik kaxak erosi eta sagardo saritua probatzeko.

Iturriak