Udazkena iristean, sagardoa egiteko sagarrak biltzeko garaia da, eta baita Nafarroako Sagardo Eguna ospatzekoa ere; duela 18 urtetik Lekunberrin egiten den hitzordua da, eta pandemiak ere ez zuen hura eten. Edari honek mikologiarekin partekatuko du protagonismoa igande goiz bizi batean.

Ohi bezala, Nafarroan egindako sagardorik onena dastatu ahal izango da betiko formularekin: 4 euroko basoa erosita, Aldazko Martitxonea, Lekarozko Larraldea, Lesakako Lindurren borda, Lekunberriko Toki Alai eta Madozko Perkatzenea sagardotegietako sagardoak dastatu ahal izango dira. Bost sagardotegi horiek Asociación de Productores de Sidra de Navarra elkartean biltzen dira, eta hark antolatzen du hitzordua Lekunberriko Udalarekin batera. Edariarekin batera taloak, inguruko gaztak edo ogi artisaua izango dira, besteak beste, baita artisautza ere sagardo-jaiarekin batera egiten den azokan.